RMN DYRI ILOILO LIVE STREAMING

Audio Only
Video Only

BATA KAG IYA LIVE-IN PARTNER, NALAGYO MATAPOS GINBUNO ANG AMAY

jt

ILOILO CITY – Ara na sa luwas nga kahimtangan ang amay nga ginbuno sang iya anak sa Central Market, Sabado sang hapon.

Baliskad sa una nga report, gin-athag sang pamilya nga wala ginabawi sang amay nga si Eduardo Tan ang pwesto sa merkado nga ginhatag sa iya bata nga si Edlin kag sa live-in partner sini.

Antes ang insidente, ginpahayag sang pamilya nga nag-away si Edlin kag ang iya live-in partner. Bangod sa ila away, ginpamuka sang babaye ang mga pinggan, yahong kag iban pa nga gamit nga ginpundar ni Mr. Eduardo Tan kag sang iya asawa.

Nahibaluan sang amay ang ginhimo sang live-in partner sang iya bata nga si Edlin gani ginsaway niya ini kag ginmunuhan nga sukmaan ang babaye.

Sabado sang hapon sang magtingob sila nga tatlo sa central market sa diin ginsukmaan sang amay ang live-in partner sang iya bata.

“Ano sa pamatyagan mo kay wala na ta galamiton?” ang hambal sang Tatay sa live-in partner sang iya bata.

Suno sa pamilya, matapos sini naglakat na kuntani si Eduardo Tan apang nagpamuyayaw ang babaye gani nagbalik ini.

Gin-ako sang pamilya nga ginsing-alan sang Amay ang live-in partner sang iya bata bunga sang kaakig matapos ginbuyayaw ini sang babaye.

“Asawa ko na!” singgit sang iya bata nga si Edlin kag ginsumbag ang iya amay kag ginbuno.

7 ka pilas sa nagkalain-lain nga bahin sang lawas ang naagom sang amay nga nga nagapanagang lang sa buno sang iya bata.

Kritikal nga gindala sa ospital ang amay apang maswerte nga nakaluwas sa bulig sang mga doktor.

Suno sa pamilya, kaagi na lulong sa illegal nga droga si Edlin. Subong man, ginpa detox ini sang ila amay kag sang nagpu-as na ang droga sa iya lawas, ginhatag sang amay ang pwesto sa Central market sa ila nga maglive-in partner para makasugod sang panibag-o nga kabuhi.

Matapos ang nahimo sa iya amay, nagpalagyo si Edlin upod ang iya live-in partner.

Plano karun sang pamilya nga pasakaan sang kaso ang duha.

Share and Enjoy

Leave a Reply

Your email address will not be published. Required fields are marked *