Kalibo, Aklan— nakita na ang madugay nadula nga si Elisa Dy, 39 anyos sang Kalibo, Aklan matapos masapwan ang mga tul-an sini sa sulod sang septic tank kahapon.

Nahibaluan, nadula si Elisa sang Abril 24 matapos sakiton sang bana nga si Benie Dy suno sa mga nakasaksi sa ila away.

Natultulan ang nahamtangan ni Elisa matapos dululungan nga nagdamgo ang apat ka mga utod sini nga naga-istar na Spain, Batangas, Manila kag Kalibo nga ginpatay ini kag gintago sa isa ka buho nga may pader, las 11 sang gab-i sang Nobyembre 1, piesta minatay.

Nangayo sang bulig sang National Bureau of Investigation (NBI) ang pamilya kag didto nasapwan ang kalabera sang biktima nga may telephone cord pa nga nakahigot sa iya liug sang ginbuksan ang septic tank sa ila ugsaran.

Ginatudlo suspect sa kamatayon sang biktima ang bana sini nga si Benie Dy.
Antes nakita ang bangkay, una gindakop sang mga otoridad ang isa ka boy sa karenderia nga si Sammy Sarciano matapos nagtext kag nagpangayo sang 50 mil pesos nga reward money kabaylo sang pagtudlo sini kun diin ang bangkay ni Elisa Dy.
Bitbit ni Sarciano ang tsinelas sang biktima apang wala ini nanugid kun diin ang lawas sang biktima.